ـ رەوتی سەدر كە موقتەدا سەدر سەرۆكایەتیی دەكات داوا لە تەباییی دەوڵەتی یاسا كە نووری مالیكی سەرۆك وەزیرانی دەسەڵات بەكۆتاهاتووی عێراق سەرۆكایەتیی دەكات، پاڵاوكی خۆی بۆ پۆستی سەرۆك وەزیران بگۆڕێ لە پێناو چارەسەركردنی كێشەكانی ناو هاوپەمانییی نیشتمانی لەسەر پرسی سەرۆك وەزیران.
سەڵاح عوبێدی گۆتیاری رەوتی سەدر بەئاژانسی كوردستان بۆ دەنگوباس (ئاكانیوز)ی ڕاگەیاند "لە سەرتاوە ئەوەمان راگەیاندووە كە دژی‌ كاندیدكردنەوەی‌ مالیكیین بۆ پۆستی‌ سەرۆك وەزیرانی داهاتوو، هۆكارەكەشی بۆ سیاسەتە خراپەكانی‌ حكوومەتی‌ ئێستەی عێراق دەگەڕێتەوە"، ئاماژەی بەوەش دا "كاری‌ وەزیرەكانی‌ كابینەكەی‌ مالیكی‌ لە ئاستی‌ پێویستدا نەبووە، حكوومەتەكەی لە هیچ ڕووێكەوە سەركەوتوو نەبوو، ئێمەش نامانەوێ چیتر خەڵكی عێراق ببنە كێڵگەی تاقیكردنەوەكانی ئەو حكوومەتە".
زیاتر گوتی "سەركەوتنی‌ دانوستاندنەكانمان لەگەڵ تەباییی دەوڵەتی یاسا پێوەستە بەوەی‌ ئەو تەبایییە كاندیدی‌ خۆی‌ بۆ وەرگرتنی‌ پۆستی‌ سەرۆكایەتیی‌ وەزیران بگۆڕێ".
"بەهیچ كاندیدێك رازی نابین كە لەلایەن خودی مالیكییەوە پێشنیاز بكرێ" عوبێدی وای گوت.
عوبێدی ئاشكرای كرد "سیاسەتەكانی مالیكی وای كردووە پێكهێنانی حكوومەت لە كاتی خۆی دوا بكەوێ و گرژی بكەوێتە ناو لایەنەكانی عێراق و دەستێوەردانی دەرەكی زیاد بكات"
ڕوونی كردەوە "سووربوونی‌ تەباییی دەوڵەتی یاسا لەسەر كاندیدكردنەوەی مالیكی، گفتوگۆكانی نێوان تەباییی نیشتمانی و تەباییی دەوڵەتی یاسای وەستاندووە".
"دواكەوتنی پێكهێنانی حكوومەت دەكەوێتە ئەستۆی لیستی دەوڵەتی یاسا، چونكە لەگەڵ هیچ لیستێكدا ڕێك ناكەوێ و نایەتە سەرمێزی گفتوگۆ لەگەڵ لیستەكانی تر و تەنیا ڕەچاوی بەرژەوەندییەكانی خۆی دەكات" عوبێدی وای گوت.
لای خۆیەوە عزت شابەندەر ئەندامی تەباییی دەوڵەتی یاسا بۆ (ئاكانیوز) گوتی "ئامادەنین دەستبەرداری‌ پۆستی‌ سەرۆك وەزیران بین بۆ لیستی‌ عێراقییە"، ئاماژەی بەوەش دا "ئەو پۆستە بۆ شیعەكانە ‌و پێویستە سەركردەكانی‌ عێراقییە ئەو ڕاستییە بزانن".
زیاتر گوتی "ئێمە لەگەڵ تایەفەگەریدا نین، بەڵام لە هەلومەرجی‌ ئێستای‌ عێراقدا مالیكی‌ شیاوترین كەسایەتییە بۆ پۆستی‌ سەرۆك وەزیران".
ڕوونی كردەوە تەباییی دەوڵەتی یاسا سازش لەسەر پۆستەكانی تر دەكات، بەڵام لەسەر پۆستی سەرۆك وەزیران سازش ناكات و هەر كەسێكی تریش ڕەت دەكاتەوە ئەگەر ئەو كەسە لەلایەن لیستەكانی ترەوە بۆ وەرگرتنی پۆستی سەرۆكایەتیی وەزیران پێشنیاز كرابێ".
هەردوو تەباییی دەوڵەتی یاسا و نیشتمانیی عێراق لە 4ی ئایار/مایۆی ڕابردوو پێكهێنانی هاوپەیمانیەتیی خۆیان ڕاگەیاند و لە 10ی حوزەیران/یۆنیۆی ڕابردوو بەڕەسمی هاوپەیمانیەتیی خۆیان بەناوی (هاوپەیمانیی نیشتمانی) ڕاگەیاند بەئامانجی دروستكردنی گەورەترین بارستەی ناو پەرلەمان و پێكهێنانی حكوومەتی داهاتووی عێراق.
بڕیار بوو پێرێ سێشەم دانیشتنی پەرلەمانی عێراق بەڕێوە بچێ، بەڵام لەبری ئەوە سەرانی بارستە سیاسییەكانی ناو پەرلەمانی عێراق كۆ بوونەوە و بڕیار درا دانیشتنی پەرلەمانی عێراق بۆ كاتێكی نادیار دوا بخرێ و حكوومەتی مالیكیش بكرێتە حكوومەتی ڕاییكردنی كارەكان.
سەرانی بارستە سیاسییەكانی عێراق لە 12ی ئەم مانگە (تەمووز/یۆلیۆ) نووچیان خوارد لە گەیشتن بەرێككەوتن لەبارەی گرێدانی دانیشتنێكی پەرلەمان، ئەوەش وای كرد پەرلەمان وادەی دانیشتنی خۆی بۆ 2 هەفتەی تر درێژ بكاتەوە بەئامانجی گەیشتنی لایەنە سیاسییەكان بەرێككەوتنێك.
لە 7ی ئادار/مارسی ڕابردوو هەڵبژاردنی پەرلەمانی عێراق بەڕێوە چوو، كۆمسیۆنی باڵای هەڵبژاردنەكان لە 26ی هەمان مانگ بەرەنجامی هەڵبژاردنی ڕاگەیاند، لیستی عێراقییە بە91 كورسی پلەی یەكەمی بەدەست هێنا و تەباییی دەوڵەتی یاسا 89 كورسی و تەباییی نیشتمانیی عێراق 70 كورسی و لیستی هاوپەیمانیی كوردستان 43 كورسیان بەدەست هێنا